ബി. ലേഖ
തീരെ ചെറുതെന്നുതോന്നുന്ന
വലിയ കാര്യങ്ങൾ..
ഉദാഹരണത്തിന്
ഒരു ദിവസം മാത്രം
ജീവനുള്ള പൂവായിരിക്കും
ഒരു മനുഷ്യായുസ്സിന് കൂട്ടുപോവുക
ദിവസങ്ങളോളം നെറ്റിയിൽ
പറ്റിപ്പിടിച്ചിരിക്കുന്നൊരു
കുഞ്ഞു പൊട്ട്
നീയൊരു പൊട്ടു പോലുണ്ടല്ലോന്ന്
നിരന്തരം ഓർമ്മിപ്പിക്കും..
കാലം കുഴിച്ചിട്ട ആദ്യത്തെ വാച്ച്
ഇടയ്ക്കിടെ ചെവിക്കു പിടിക്കും
സമയബോധത്തിന്റെ കീ തന്ന്
നഷ്ടങ്ങളെ മായ്ച്ചു കളയും..
ആദ്യമായി കിട്ടിയ
നീല മഷിക്കൊതിയൻ
ഹീറോ പേന
ആരും കാണാതെ
നമ്മെ വരയ്ക്കും
കവിളിൽ കുത്തിട്ട് ഓമനിക്കും
ആദ്യപ്രണയമറിഞ്ഞുതന്ന
ചുംബനം
ആൽമരം പോലെ
വേരുപിടിക്കും
ഏറെ തിരഞ്ഞൊടുവിൽ കിട്ടുന്ന നാണയത്തുട്ടുകൾ
അമ്മയുടെ കടുക് പാത്രത്തിന്റെ
മണം പരത്തും
കണ്ണുനിറഞ്ഞു കവിഞ്ഞു
വെടിപ്പാക്കും
ഇങ്ങനെ..
തീരെ ചെറുതെന്നു തോന്നുന്ന
എത്ര വലുതുകളാണ്
നിത്യവും നമ്മെ
ചേർത്തുപിടിക്കുന്നത് !