ഷാലു ജോമോൻ
ഒരിക്കലെങ്കിലും എനിക്ക്
തെരുവിന്റെ ഇരുളോരത്ത്
ഒന്ന് കിടന്നുറങ്ങണം!
നിറം മങ്ങിയ മേലുടുപ്പുരിഞ്ഞ്
തിളങ്ങുന്ന ഇരുട്ടിനെയുടുക്കുമ്പോൾ
വഴിയതിരുകൾ
എന്റെ കിടപ്പാടത്തിലേക്ക്
ഇഴഞ്ഞടുക്കുമായിരിക്കും!
ഒരൊറ്റ ദംശനത്തിൽ
ചത്തുമലച്ച വഴിക്കണ്ണുകളെ കുറിച്ച്
ഇരുട്ടിൽ ഋതുഭേദങ്ങൾ
എങ്ങനെയുണ്ടാവുമെന്ന്
നിലാവിനെക്കൊണ്ട്
അപ്പോൾ ഞാൻ കുറിച്ച് വയ്പ്പിക്കും !
തെരുവിലൊരു കവിത
ധൈര്യത്തോടെ
നൃത്തം ചെയ്യുന്നുവെന്ന്
നക്ഷത്രങ്ങൾ
സാക്ഷി പറയും !
നഗ്നതയുടെ വെളിച്ചക്കീറിനെ,
വാക്കിന്റെ അഗ്നി തുപ്പുന്ന
ഇടിമിന്നലിനെ,
പകലിന്റെ നിഴലിരുട്ടിലിരുന്ന്
ആരെക്കെയോ
ഭയക്കുന്നു!
അതേയിരുളിന്റെ
മറവിൽ നിന്നവർ
എന്റെ ഇടനെഞ്ചിലിരിക്കുന്ന
മിന്നാമിനുങ്ങിന് നേരെ
കാഞ്ചി വലിക്കും!
അപ്പോൾ ഞാൻ
തെരുവിന്റെ ഒരോരത്ത്
ഉറക്കമുണരുകയും
ഒരായിരം
മിന്നാമിനുങ്ങുകൾ
തെരുവിന്റെ
ആകാശത്തേക്ക്
പറന്നുയരുകയും ചെയ്യും!!