ബേജാർ

ഫാത്തിമ നൂറ

കിണ്ടിയിലെ വെള്ളം കാലിലൊഴിച്ച്

തട്ടം താഴ്ത്തി, അകത്തു കയറുമ്പോൾ

പൈൻമരക്കൊമ്പിലിരുന്ന് ചിലക്കുന്ന

ഒറ്റമൈനയെ ഉമ്മാമ നോക്കുന്നുണ്ടായിരുന്നു

മുറ്റത്തിറങ്ങി കൈക്കോട്ടെടുത്ത

ഉപ്പാപ്പ റൂഹാനിക്കിളിയുടെയൊച്ച

കേട്ട് നെഞ്ചൊന്നുഴിഞ്ഞു

ആവി പറക്കുന്നൊരു കപ്പ് സുലൈമാനി

തിണ്ടിൽ വെച്ച് മടങ്ങുന്നുമ്മയോട്

ഉപ്പാപ്പ ചൊല്ലി : ഇനിയെന്താണാവോ?

വൈകിച്ചെന്നിട്ടും, ഉസ്താദില്ലാത്തതിനാൽ

അടി കിട്ടാത്ത സന്തോഷം

ഇത്താത്ത പറയുന്നുണ്ടായിരുന്നു

‘മോല്യേർക്കെന്ത്യേ’യെന്ന ഉമ്മാമയുടെ

ചോദ്യം ആവലാതിയുളവാക്കി

ചില്ലറ കുലുക്കി വെറുംകയ്യോടെ വന്ന

ഇക്കാക്ക പരിഭവം പറഞ്ഞതിങ്ങനെ;

അയമ്മുദാക്കയിന്ന് പീട്യ തൊർന്നീല്ല്യ

ചെവിട്ടത്തെ ഫോണെടുത്ത് കീശ

യിലിട്ട്, മുണ്ട് തോളത്തിട്ട് ഉപ്പാപ്പയിറങ്ങി

ബഹളം കേട്ട് പുറത്തിറങ്ങി

മതിലിറങ്ങി കേറിനോക്കിയപ്പോളാണ്

ആ കാഴ്ച്ച കാണുന്നത് ;

“അയലക്കത്തെ അയ്ശാത്താന്റെ

പൊരേൽ പന്തൽ കെട്ടുന്നു”